Jivit Devachem dennem.
Daniel F. de Souza.
Inglez bhaxen oxi kitem ek mhonn asa; ‘ Life is God’s gift to us and what we make of it, is our gift to God’ . Hacho orth oso zata; Jivit amkam Devachem dennem ani tacho ami koxe toren labh ghetanv tem amchem dennem Devak. Dor ekleak amkam Devan kheritponnim rochleant ani kherit gunn dileat. Hea gunnacho vapor korun ami amchem jivit sartanv ani jivitant yes melloytanv. Zaite pautt ami jivitachea rattavolint guspon astana Devachea denneam ani Devan dil’leam gunna khatir Devak dhinvasunk ani vakhannuk sap visortanv. Amche azu-bazuk zor tor ami ek chaltich nodor firain tor amkam sabar mon’xam distolim jim torekvar bhaxen zolmant savnuch ophangull asat. Kaim zannam kurd’ddim zalear kaim zannam monim…thoddim thonttim…adi. Punn soglleank Devan jivitant koslem nam koslem karia dilam ani tanchi kuddichi oskotai legun kodek marun hem Devan dil’lem karia tim xarti pavoitat ani somazant nanv meloytat.
Fevrerache 12ver sanje velar hanv Ponnje Kala Akademi vosreant Jose Feliciano hacho songit konsert polleunk gel’lom. Jose Feliciano ho ek Puerto Rico-cho sonvsar bhor namnna zoddlolo songit kolakar. Tannem sov pautt ‘Grammy’ puroskar jikhleat. Natalam somoiar ‘Feliz Novidad’ natal git ami gaitanv tem tannem rochlam, songit dilam ani gailam. Vosreat lok khub chikar bhorlolo. Zaite Vascokar songit mogi thuim mhaka zollkolet. Ho konsert khub unch dorjeacho aslo. Torekvar pod’dotichem songit aikonk mel’lem. ‘Feliz Novidad’ natal git legun tannem thoim gailem. Konsert dhedd vora uprant somplo torui lok vosreantlo bhair vochunk kobul nam zalo. Talliancho xinvor korun ube ravon (standing ovation) Jose Feliciano-k xabaski dili. Konsert sompoun bond kel’lo porddo tannim novean ugoddcho poddlo ani lokanchea magnneak man diun Jose Felieciano portun machier yeun anik ek git gailem ani soglleank dadhoxi kele. Oslem hanvem hea poilim khuinch polleunk nam. Hea poilim hanvem Abba, Osibisa, Boney M, adi hanche show polleleat, punn 65 vorsanchea Jose Feleiciano-k lagpi konn nam hem koslich otitai korinastana mhojean sangunk zata. Guitar vazovpachi tachi pod’dot ani takot veglich. Tache hat ani bottam guitaracher taktiken sull’sullit dhanvtat tim polleunk kovtuk diso.
Hem borounk karonn mhollear, Jose Feliciano zolmant savn nibel kurd’ddo. Taka donui dolleanim kainch disona. Machier to ekach zagear bosun guitar vazta ani gaita. Tem guitar pasun taka dusrean haddun tachea hatint diunk zai. To don toranchi guitram vazoita, ek ‘electric’ zalear dusrem ‘Acoustic’. 65 vorsanche piraier legun tacho avaz itlo okhondd ani nivoll ki to aikoteleak sapuch dipkaun udoita. Mhaka-i uddoilo. Devan taka zolmant savn kurd’do kelo punn songitacho gunn taka dilo ani to lhan tin vorsancho astananch savn songita vangdda tacho sombhond zalo. Sonvsarant songit mollar vhodd namnna zoddlele anik kaim songitkar asat zoxe porim Stevie Wonder, adi. Beethoven zannem sundor songit rochlam ani aiz legun tem gazta to zolmant savn bhero aslo.
Vasku xarant osoch donui dolleamnim sap kurdd’do ek Hindu bhav asa. To zolmant savn kurdd’do nhoi punn taka kurdd’deponn mat bhurge piraier ailem. To kurd’do zavn torui aplea hati payamcher ubo asa. Kodelink ani volterank rotesanv korpachem kam to xikla ani aiz konnachoch sohakar nastana nazukponnim nitoll ani nivoll hem rotesanvanchem kam korta ani aplo dis’poto choloita. Hanvem hem dolleanim dekhlam. Hanchi tokhnnai kortana, ani tanche koddsun jivitak ut’ tejon ghetana…amkam Devan soglle kuddiche sande vevosthit dileat dekun ami Taka vakhanndunk favo. Zorui tor sonvsarache rattavolint revddun astana hea vostuncher tuka lokx ghalunk azun vell mellonk nam zalear….ho prachit kall tuka hem korunk anik ek bori sondhi dita. Ticho labh ghe. Jivit ek Devachem dennem mhunn mandun ghe ani Devan dil’leam kiddicheam sandheam ani gunna pasot taka argham diun jivitant yes melloy ani jivit folladik korun tujem dennem Devak bhettoi.
