Yadinchea somdiran.....
Goychea Saibachea festachim porbim tumkam soglleank ditana, kaim pornnea goycheo ani Goychea Saibachea festa vixim adleo bhurgeaponnayleo godd godd yadi monachea darantlean pasar zaleot. teo hanvam punzaileat ani hanga tumkam vanttam.
* lhan asatana mhoji maim mhaka chukoinastana Goychea Saibachea novenak vhortali. Ti porampora hanvem azun meren moddunk nam. Vetana panvant ghalun cutlets, vo bottateanchi bhaji nasto korpak ti vhortali. mhaka chodd xi bottateanchi bhaji avoddtali. uprant mis zatoch ani umanv gheun zatoch, basilikechea kur'redorant boson ami magir tem khataleanv. Ferient bhovon chonne, revddeo,mana, undde bi vikhte ghetaleanv. (tedna Saibachea Goyam vetoch unddo ani chonne haddun xezareank divop ek chal asli, bardesant tori) atam ti asa vo nam ti hanv nokllom.
Mhaka girgireachi chodd avodd asli, hanv tem thuim ferient ek ghetalonch ani bosint bosun tem magir zonela bhair dhortoch tem vareachea nettar itlem rosten gunvta tem polleun ek atvich khoxalkai bhogtali. Chodd korun tem girgirem vattekuch moddo. Ghora kednach pavo naslem.*
Goyam vochonk char panch dis asa mhonnlear mhojer ek akant yetalo. Kiteak?? Are Baba, hanv bhurgo astana doriantlean provas korpak tharech bhietalom. Betim savn Ponnje feri bottintlean mandovi nodd par korpak mhojer akant kol'kol yetalo ani hanv soglleam santam bhogtank ulo martalom. Goychea Saibak poilo.!! Actually, soth sangachem mhonnlear, he firibottiche bhirantin mhaka Goyam vochpakuch naka distalem. Punn dusrea vordan mhaka dusrem nanv tea Santachem asa (Francisco) mhonntoch taka rag bi yet mhunn bhieon hanv zap kaddnastana vetalom.
* Eka vorsa mhaka ugddas asa amchea kaim sezaream vangdda ami ek vhoddli romari korun sanje adesak pornnea goyam ghel'leanv ani sanjer mis bi aikon zatoch ek rath thuim basilikechea kor'redorant pen'nem korun ravleleanv. Dusrea disa sanjer magir portim ghora ail'leanv. Tea vorsa mhaka thuim eke kodden baim asa ani te baint Sam Francisk nhavtalo mhunn soth mandtat. Thuim hanv char kovxe udok nhavlolom to mhaka nibel ugddas asa.
* 1974 vorsa Goyam Saibachem exposition zal'lem tedna hanv lhan iskolacho bhurgo. Punn iskolant Indian Red Cross ani Scouting pongddacho fuddari. Dekun hanv sumar 15 bhurgeancho iskolantlo pongodd gheun don pautt dha disank goyam ghel'lom thuim mozot korpak. Tedna, atam Goy Pulisent SP Anita Rodrigues asli ti 1974 vorsa Sub-Inspektor asli. Egdom sundor diso. Dipkavn uddovpa sarki. Ti egdom ‘strict’ (koddok) asli hacho mhaka sarko ugddas asa. Tika ami Control roomant report korchem poddo, ani tichea koddlean amkam margdorxonn melltalem. Ti Sub Inspektor asli ti SP zaun bospagari zali. Hanv bhurgo aslom to tornatto zalom, vhaddlom, nokrek laglom....kazar zalom, bapui zalom, kens pikle....Vorsam koxim dhanvlim tench gomona.
* 1984 vorsa Goy Saibachea exposition zal'lem tedna ami char ixtt (Joe D'Mello Sangolda, Babacier Gonsalves Agacaim, Tommy Alphonso Vasco ani hanv) ekttaim yeun thuim ek 'Companheiros' nanvanchem restaurant ghatlem, Se Cathedral asa taka patlean lagsaruch. Ho nirnnoi ek dis auchit chovgui bosun asle tedna zalo. Ani ami to ek 'adventure' koso ghetlo. Tornne rogot xiranim dhanvtalem....khuinsorui uddki marpak ani kosleim kam apnavpak sompem zatalem...pattim fuddem chintunk poddonaslem. Chovgui ami ek-ektto palli (turns) gheun tem restaurantacho karbar polletale. Randop sogllem ghora korun haddtale. Amchem sorpotel ani pork vindhalo thuim egdom hit zal'lo. Lok parcellam pasun korun vhortale, plastic xinxeanim ghalun. Amcho vindhalo ani sorpotel Karachi pasun pavlem. Karan thuinchi ek kristi romari ailoli, ani tankam tem itlem borem laglem ki tannim amkam adim fuddench 'order' dili omkea disa ami portun yetanv fokot sorpotel ani vindhalo vhorpak mhunn.Soglleam poros hanvem kam thuim ravpachem thoddem kelem. Karann okosmat exposition chalu astana, mhaka MPT-chi volleyball team Manager mhunn Orrisak vechem poddlem ani thuim 12 dis sumar ghele. Amkam vhoddlo kaim faiddo zalonam...ani luksonnui zalenam...punn ami kitem tori novem kam kelem ani tem xarti pavoilem mhunn amkam ap-dadhosponn bhoglem. Ixttagoth vahddli. thoddi bhov 'entreprenuer-ship' xikleanv.
* 1994 exposition-a vhelar hanv kazari mhoje ghorkarnik gheun Saibachea Goyam ghle'lom. Uprant 2004 exposition yeta mhonnlear hanv Bapui zal'lom.....tedna poilech fautt Goychea Saibachi kudd polleunk mhoji dhuv Bernice amchea sangatak asli. Tedna tika nnov vorsam aslim. 2004 exposition-a vhelar tor hanv sabar pautt thuim pavlam kon-na-tor-konnak gheun.* 2006 Mars mhoinneant hanvem pornnea goyam tiatrist Ben Evangelisto sangata tache VCD-k (Ben's top Hits) 'walk the talk' pod'dotin tachi sabar zageancher ek konknintlean mulakhat ghetli survat korun 'viceroy dharvonteacher'. Ti tumkam te VCD-cher polleunk mellta. Tor heo asleo mhojeo Saibachea Goy ani SAibachea festa vixim godd-godd yadi.
Mog asum di....
Daniel F. deSouza,
Vasco, Goa.
No comments:
Post a Comment