TIATRO “MAIM TUZO UPKARI HANV”.
Voilea navancho Tiatro Shri Roseferns hanne boroilolo and tannenuch direct kelolo anvem 4ter hea mhoineache Hawally A/C Hallan pollelo. Zorui ho tiatro 3.30 horar survat zatolo mhonn kharbareani gomoilolem pun xekim ho tiatro survat zalo 4.30 horar. Survatak Salan zobor so lokh naslo pun soukas-soukas korun lokh maguir illo choddlo pun zaiteo kodeli khali asleot zantun dakoitalem ki sal bhor lokh thuim tea dissa naslo mhonn. Hantun aniek pavtt gomon eta ki Kuwaitcho lokh tiatrancher ani tiatristancher atam vazela karann tiatrist hanga aplim dongam ani politic subeij kortat mhonn. Hi politik hanga konne survat keli? Tis vorsam fattim hanga Alexinho de Maxem mhonn fankivont tiatrist also ani to he porim politics korpak poilo also. 1975 vorsant hanga Agostachea mhonean poilech pavtt Alfred ani Rita Rose ailolim tedna ekdom politics zaloli Alexinho de Maxem hachea fuddariponna khal. To hangasorlo vetoch amche modem zaiti sovostkai asli. Pun uprant sumar 5 – 6 vorsam fattim Jose Rod hanga etoch porot politics korpak survat zali. Jose Rodan aplea tiatristponnache kopxechea forsan ek commandment ghatlo tiatro dakoitoleank ki “To tumchea tiatran aslear aum nachona”. Jose Rodak hangacheam enddeam tiatristam modem illem subeiz vozon assa ani hea voznacho faido gheun tanne apli dadageri korpak survat keli zache vorvim nhoich tiatristam modem pun amchea samaza modem passun futt poddli. Lokh takach nhoi pun tiatristank ani tiatrank passun vittelo ani te vittecho nikal mhontlear aiz amcheam tiatrank hanga adle porim lokh eina. Ho zaun assa lokancho nixedh tiatristanche suberbaecher.
"Taka" Konkani palkavelo nattak korpak Jose Rodan fuddakar ghetlo ani Sonvstha ghoddli, thoddim vorsam hero kosso zalo ani atam zala zero karann tannenuch ghoddlele sonvsthentlo toch atam bhair poddla. Kelem tukam ani zalem makam. Apleamchim tema sufoll korunk zai mhonn nhoich tiatristam modem pun Goykaram modem passun futt ghatli, bhav-bhavam ani ghanv-bhavam modem duspott keli, sezaream – sezaream modem uzo ghatlo, ghov-bhalam modem haddambo ghatlo ani tanchea sakramentan vikh votoilem ani he porim sogleak duspott keli. Hem ek vhodd mha-patok ani oslea patkak bhogsonne na. Ani zanni konnem taka oslim patkam adharunk tenko dila te tachea poros dobradan patki. Ani oslea futti ani duspotti tiatristak zo konn aplea tiatrani bhag gheunk soeg dita to ki vhoddlo devchar nhoich don singacho pun 4 singacho.
Sukurrin aslear aum na oxo denkor ghalpi tiatrist aiz khuinchea estadar assa? Hem chintlaim re Kuwaitkar tiatrist mojea bhava? Rogtachea fustar un’na martai, nisron poddxi zalear porot ukol zanvchona. Gorbhan cholonakai karann ghorbak ani sorgak khuim bhett na. Minguel Rod aplea eka philosophical ghitan oxem ghaita "Ghorban cholteleachem, ghor khuim aslem okondd fatranchem, pun dukrache xempddek hadon dhurik moddlem babddeachem". Devachea marank avaz na. Lornak anink palkar eunk ou ghitam ghavunk aum kossoch divchona oxem mhonnpi navadik songitkar Chris Perry atam khonddan nidla pun Devachea navan Lorna azunui zogzogta. Korta tea mapan bhogta. Aiz makam tor faleam tukam. Zo kon peleache articher hadd veta to Devak okman korta karann kola zaun assa ek dhennem Devachem, tacher konnenuch hadd vochonk zaina ani hadd veta to Devachea denneacher onit korta. Oniticher xikxa mhonnchem kuddepon, tonttepon, bherepon, ghorabean duspottpon, bhail-burgeanche disgras aiz nhoi tor faleam pun jerul. Zannarani ani xekddeani show dakoilolea unchlea senior tiatirstani taka soirannan haddcho na tor peleachi art kobar korunk vetana xekim Devachi khast lagon apununch kobar zatolo. Oxem zalolem makam naka karann Konknni palkavelem aniek noketr itle lhanuch piraer nattak zalolem makam nakam. Konknni palkak ani Konknni bhaxek uxear tiatristanchi ghoroz ani to ek uxear tiatrist zalolean to amchea palkar subeij kall urcho mhonn hem boroup kortam.
Roseferns orxim ek boro Tiatro boroupi ani digdorspi oxem somzon aum hea tiatrak ghelolom. Hea tiatracho zaito prochar anvem goa.kranticher kelolo. Pun xekim aum ghelom axen ani sermaum sanglom firngi bhaxen, he porim makam ghoddelm. Nhoich makam pun sabar zannak. Tiatrachi istor kaim kamanchi nasli, directoran aplo kaido sarko kelona. Nimnnea poddeak illo abru favta zorui moddem ghoran kaxavan astana chorcha zata ti sobe sarki nhoi. C. Alvares, Prem Kumar, Alexinho de Candolim ani M. Boyer hanche sarkele kormole director oxleo chuki kedinch korche nasle. Har nachta mhontlear ghannoi nachlear zaina. Hea tiatran chaum-meaum subeij dista. Rosroxit poleachem ani rupest disnneachem torne piraechem Roshan materichi bhumika korta ti sarki “fail”. Roshanachem bhurgem rup zantte ostoreche “fremin” ghatlear taka zanttepon dina. Filomena Braz tea kallar zantte ostorechi part kortalem tacho ugddas konnak tori also zalear borem zatem. Comedy babtin tiatro porot “fail”. Aum nokom koxe porim hea tiatrache 99 show Goyant zalet te ani lokani koxe porim itle show zait passun ho tiatro pollelo to.
Aiz century marop zalam fokann. Lokui zala sovai he porim century korunk. 1958 vorsa Airestedes Dias hanne aplo "Doia" Tiatro dakoilolo tedna kheddea ghanvani passun to tiatro don-don pavtt zalolo. Tea kallar ek tiatro kheddea ghanvani don-don pavtt dakoup mhonnchem aizchea kallar nhoich xembor pun paimxim show zavop. Te tiatrist melet ani tanche borobor tanchi unchli tiatro kala khonddan gheli. Aizche kaim tiatristui sovai ani zaito lokui tea poros sovai. Tea kallaili tiatro kala fuddem vorpi aslet umdiche tiatrist, zannvaen piklole ani soimbik dhenneani buddlole pun aiz tiatro kala uklun dhorlea poixeanche axen karann aiz tiatr kala zaun gelea ek dhondo. Kalche oznadik tiatrist unch tiatr kala dakoun passun bhikari melet tor aizche tiatrist pochpochit tiatro dakoun lakpoti zaun bosleat. Tanchea modleam zaiteam zannachem sintid fokot CD, VCD ani DVD vikun poixe korpachem ani nhoi aplem mon tiatrancher ghalun lokank dadoxi korpachem. Voznadik Tiatrist ani director adlea tempaile “Pornekar” koxe potio gheun Kuwait Citin apleo CD-VCD-DVD viktalet tem polloun atvench distalem. Adlea kallaile pornekar ghanv-ghanvani bovon nare ghaltalet mhonnon "pornem assam pornem" tor aizche kaim navadik tiatrist Maliya Kuwait Citin ani Igorje laguim oxem mhonttalet "VCD zai - VCD??"
Fokot ek Dinar.
Hea tiatran ekui ghit voznadik oxem naslem, ekai ghitak “intellectual touch” naslo zorui Tarichem ghit lokank borem avoddlem karann to ek Hindu assunui Christi dhormanchi tanne vakanni keli mhonn. Hea ghitan tann apleak khup “sympathy” ghetli kiteak hallantlo 99% lokh Christaum also mhonn. Lhan bhurgean ghitam ghaun lokancho khup abru zoddlo. 4 vorsanche piraer he porim itli uxear dakoup hem ek nazukuch koxem. Tanne uxearki dakoili ti khori pun lhan bhurgo zalolean lokani taka apli khup apurbai dili. Tiatristanche ithiasin Master Vaz khuim tea kallar ekdom bhurge piraer palkar choddlolo ani heach passot taka Master Vaz mhonn naum poddlem. Tea upran 1958 vorsa Bab Lipo ekdom lhan piraecher palkar dislo Airestedes Dias hachea Doia tiatran. Amchea ghavan Aguadche unch dhorjeache pakle fokot taka pollounk tea tiatrak hazir aslolet ani xeboi marun taka abru ditalet. Pun Roseferns hachea tiatran Baba Maythan hanne ek record korun dovorlo. Taka ani tachea bapaik abru favo.
British cheddum 15 vorsanchem, Scarlet navanchem haka Anjuna praecher jivem marlem tache voir kon tori ek ghit ghaitolo oxem distalem pun Roseferns hachea ekai tiatristan apli kopxi dakoilina "latest topic" hacher ghit ghaun. Heach passot M. Boyerachi amchea palkak ghoroz asli.
Songitache baptin boroitolo mhontlear musical feelings kanank kanheor kortalem zache vorvim partintlim utram aikonk augodd zatalem. Mike system titli bori cholonasli.
A. Veronica Fernandes,
Kuwait.
No comments:
Post a Comment